விற்பனை மற்றும் சேவை வரி (SST), அத்துடன் 2027ஆம் ஆண்டுக்கான வரவு செலவுத் திட்டத்தில் அறிவிக்கப்பட்டதாகக் கூறப்படும் வருமான வரிச் சலுகைகள் தொடர்பாகத் தவறான மற்றும் மக்களைத் திசைதிருப்பும் தகவல்களைக் கொண்டதாகக் கூறப்படும் சமூக ஊடகங்களில் வைரலாகும் காணொளியை மலேசிய தொடர்பு மற்றும் பல்லூடக ஆணையம் (MCMC) ஆய்வு செய்து வருகிறது.
இந்தக் காணொளி சமூக ஊடகங்களில் பரவி வருவது தொடர்பாகப் பொதுமக்களிடமிருந்து புகார்கள் கிடைத்துள்ளதாக MCMC தெரிவித்துள்ளது.
இத்தகைய தவறான தகவல்கள் நாட்டின் வரிவிதிப்புக் கொள்கைகள் குறித்து மக்களிடையே குழப்பத்தை ஏற்படுத்துவதுடன், ஆதாரமற்ற அச்சத்தையும் உருவாக்கக்கூடும். மேலும், தவறான தகவல்களின் அடிப்படையில் பொதுமக்கள் தங்களது நிதி தொடர்பான முடிவுகளை எடுக்கும் நிலையும் ஏற்படலாம் என ஆணையம் எச்சரித்துள்ளது.
இதுதொடர்பாக வெளியிடப்பட்ட அறிக்கையில், இந்த விவகாரம் நிதி அமைச்சகத்தின் கவனத்திற்குக் கொண்டு செல்லப்பட்டுள்ளதாக MCMC குறிப்பிட்டுள்ளது. மேலும், காணொளியின் உள்ளடக்கம், அது பரப்பப்படும் சூழல் மற்றும் சமூகத்தில் ஏற்படுத்தக்கூடிய தாக்கம் ஆகியவை மதிப்பீடு செய்யப்பட்டு வருகின்றன.
“நடைமுறையில் உள்ள சட்டங்கள் மீறப்பட்டிருப்பது கண்டறியப்பட்டால், 1998ஆம் ஆண்டு தொடர்பு மற்றும் பல்லூடகச் சட்டத்தின் (சட்டம் 588) பிரிவு 233 உட்பட தொடர்புடைய சட்டங்களின் கீழ் அடுத்தகட்ட நடவடிக்கைகள் பரிசீலிக்கப்படும்” என அந்த அறிக்கையில் தெரிவிக்கப்பட்டுள்ளது.
கருத்துச் சுதந்திரம் பொறுப்புடன் பயன்படுத்தப்பட வேண்டும் என்றும், பொதுநலனைப் பாதிக்கக்கூடிய தவறான தகவல்களைப் பரப்புவதற்காக அது தவறாகப் பயன்படுத்தப்படக் கூடாது என்றும் MCMC வலியுறுத்தியுள்ளது.
அதிகாரப்பூர்வ தகவல்களைச் சரிபார்க்குமாறு அறிவுறுத்தல்
2027ஆம் ஆண்டுக்கான வரவு செலவுத் திட்டம் தொடர்பான தகவல்களை நம்புவதற்கு அல்லது மற்றவர்களுடன் பகிர்வதற்கு முன்பு, பொதுமக்கள் அதிகாரப்பூர்வ ஆதாரங்கள் மூலம் அவற்றைச் சரிபார்க்குமாறு கேட்டுக்கொள்ளப்பட்டுள்ளனர்.
இதற்காகப் பின்வரும் தளங்களைப் பயன்படுத்தலாம்:
- நிதி அமைச்சகத்தின் அதிகாரப்பூர்வ வரவு செலவுத் திட்ட இணையதளம்: www.belanjawan.mof.gov.my
- Sebenarnya.my – தவறான தகவல்களைச் சரிபார்க்கும் இணையதளம்.
- AIFA செயற்கை நுண்ணறிவு உரையாடல் சேவை: WhatsApp 03-8688 7997.
- சம்பந்தப்பட்ட அதிகாரிகளின் அதிகாரப்பூர்வ தகவல் தொடர்பு வழிகள்.
சமூக ஊடகங்களில் பரவும் தகவல்களை உடனடியாக நம்பிப் பகிராமல், அவற்றின் உண்மைத்தன்மையைச் சரிபார்த்த பின்னரே செயல்பட வேண்டும் என பொதுமக்களுக்கு அறிவுறுத்தப்பட்டுள்ளது.
