உணவு வீணாவதைத் தடுப்பதுடன், தேவையுள்ள குடும்பங்களுக்கு உணவு கிடைப்பதை உறுதிசெய்யும் நோக்கில், முத்தியாரா உணவு வங்கியும் (Mutiara Food Bank) லோட்டஸ்’ஸ் மலேசியாவும் இணைந்து ‘சேமெஜா ஹராப்பான்’ (Semeja Harapan) என்ற புதிய பிரசாரத்தைத் தொடங்கியுள்ளன.
‘உபரி உணவைப் பகிர்வோம், நம்பிக்கையை விதைப்போம்’ என்ற கருப்பொருளில் இத்திட்டம் செயல்படுகிறது. இதன் மூலம், வீணாகும் நிலையில் உள்ள பாதுகாப்பான உணவுகளைச் சேகரித்து, தேவையுள்ள குடும்பங்களுக்கு விநியோகிப்பதுடன், பொதுமக்களும் உணவு மற்றும் அத்தியாவசியப் பொருட்களை நன்கொடையாக வழங்க வாய்ப்பு ஏற்படுத்தப்படுகிறது.
கடந்த 2017ஆம் ஆண்டு தொடங்கப்பட்ட முத்தியாரா உணவு வங்கியுடன், லோட்டஸ்’ஸ் மலேசியா ஆரம்பம் முதலே இணைந்து செயல்பட்டு வருகிறது.
லோட்டஸ்’ஸ் மலேசியாவின் நிறுவனச் சேவைகள் பிரிவு நிர்வாக இயக்குநர் அஸ்லிசா பைசுரா அஸ்மெல் கூறுகையில், உணவு வீணாவதைக் குறைப்பதுடன், தேவையுள்ள மக்களுக்கு உணவு கிடைப்பதை உறுதிசெய்வதே இத்திட்டத்தின் முக்கிய நோக்கம் என்றார்.
மேலும், 2016ஆம் ஆண்டு முதல் இதுவரை 24.21 லட்சம் கிலோகிராம் உணவு குப்பைக் கிடங்குகளுக்குச் செல்வது தடுக்கப்பட்டு, 1.20 லட்சத்துக்கும் அதிகமான குடும்பங்களுக்கு உதவி வழங்கப்பட்டுள்ளதாக அவர் தெரிவித்தார்.
பினாங்கு மாநில சமூக மேம்பாடு, நலன் மற்றும் இஸ்லாம் அல்லாத சமய விவகாரங்களுக்கான ஆட்சிக்குழு உறுப்பினர் லிம் சியூ கிம் கூறுகையில், முத்தியாரா உணவு வங்கி தற்போது மாநிலத்தின் 40 சட்டமன்றத் தொகுதிகளிலும் உள்ள மக்களுக்கு உதவி வழங்கி வருவதாகக் குறிப்பிட்டார்.
2026 செப்டம்பர் 30ஆம் தேதி நிலவரப்படி, பினாங்கில் eKasih திட்டத்தின் கீழ் வறுமைப் பிரிவில் 11,105 குடும்பங்கள் பதிவு செய்யப்பட்டுள்ளதாகவும், அவர்களுக்கு உரிய நேரத்தில் உதவிகளை வழங்குவது அவசியம் என்றும் அவர் தெரிவித்தார்.
இதுவரை முத்தியாரா உணவு வங்கி 2,000 மெட்ரிக் டன்னுக்கும் அதிகமான உபரி உணவுகளை மீட்டு, தேவையுள்ள மக்களுக்கு விநியோகித்துள்ளது.
இத்திட்டத்தின் கீழ், உணவு சேகரிப்பு, விநியோகம் மற்றும் பயனாளிகளை ஒருங்கிணைக்கும் பணிகளை முத்தியாரா உணவு வங்கி மேற்கொள்ளும். லோட்டஸ்’ஸ் மலேசியா தனது தேர்ந்தெடுக்கப்பட்ட விற்பனை நிலையங்கள் மூலம் உபரி உணவுகளை வழங்குவதுடன், வாடிக்கையாளர்கள் நன்கொடை அளிப்பதற்கான வசதிகளையும் ஏற்படுத்தும்.
முதற்கட்டமாக, பினாங்கில் உள்ள ஏழு லோட்டஸ்’ஸ் விற்பனை நிலையங்களில் இத்திட்டத்தைச் செயல்படுத்தத் திட்டமிடப்பட்டுள்ளது. இதில் சுங்கை டுவா கிளை முதன்மையாக இடம்பெறுகிறது.
முத்தியாரா உணவு வங்கியின் தலைமைச் செயல்பாட்டு அதிகாரி டேமியன் ஃபூங் கூறுகையில், “உணவை மீட்டு, உயிர்களுக்கு உணவளிப்பது” என்ற தங்களது நோக்கத்தின் அடிப்படையில் இத்திட்டம் முன்னெடுக்கப்படுவதாகத் தெரிவித்தார்.
லோட்டஸ்’ஸ் சுங்கை டுவா விற்பனை நிலையத்தில் கடந்த அக்டோபர் 8ஆம் தேதி நடைபெற்ற HORECA Day நிகழ்வுடன் இணைந்து இப்பிரசாரம் அறிமுகப்படுத்தப்பட்டது.
உணவு வீணாவதைத் தடுப்பதுடன், தேவையுள்ள குடும்பங்களின் உணவுத் தேவையைப் பூர்த்தி செய்வதே இத்திட்டத்தின் முக்கிய இலக்காகும். “பினாங்கில் எந்தக் குடும்பத்தின் உணவு மேசையும் காலியாக இருக்கக் கூடாது” என்பதே இப்பிரசாரத்தின் அடிப்படைச் செய்தியாகும்.
