தகவல் தொடர்பு அமைச்சர் மற்றும் 2026ஆம் ஆண்டுக்கான தேசிய தினம் மற்றும் மலேசிய தினக் கொண்டாட்டங்களுக்கான (HKHM 2026) மத்திய குழுத் தலைவருமான டத்தோ’ ஸ்ரீ ஃபஹ்மி ஃபட்சில், 2026 தேசிய தினக் கொண்டாட்டத்தை முன்னிட்டு மனித கிராபிக் (Human Graphic) நிகழ்ச்சியில் பங்கேற்கும் 1,500 மாணவர்களுக்கு மூலோபாய பங்காளிகளின் அனுசரணை நன்கொடைகளை இன்று புத்ராஜெயா டத்தரான் பகுதியில் வழங்கினார்.
வரும் ஆகஸ்ட் 31ஆம் தேதி நடைபெறவுள்ள தேசிய தினக் கொண்டாட்டத்தின் பல்வேறு நிகழ்ச்சிகளில் சிலாங்கூர், கோலாலம்பூர் மற்றும் புத்ராஜெயா கூட்டாட்சி பிரதேசங்களைச் சேர்ந்த 52 பள்ளிகளிலிருந்து 1,940 மாணவர்கள்பங்கேற்கவுள்ளனர்.
மனித கிராபிக் நிகழ்ச்சி, தேசிய தினக் கொண்டாட்டத்தின் முக்கிய ஈர்ப்புகளில் ஒன்றாக இடம்பெறுவதுடன், இளம் தலைமுறையினரின் பங்கேற்பை ஊக்குவித்து, நாட்டின் மீது அன்பையும் தேசப்பற்றையும் மேலும் வலுப்படுத்தும் நோக்கத்தைக் கொண்டுள்ளது.
இந்நிகழ்வில் தகவல் தொடர்பு துணை அமைச்சர் ஒய்.பி. தியோ நீ சிங், தகவல் தொடர்பு அமைச்சின் தலைமைச் செயலாளரும் HKHM 2026 பணிக்குழுத் தலைவருமான டத்தோ அப்துல் ஹலிம் ஹம்சா, தொலைத்தொடர்பு உள்கட்டமைப்பு துணை தலைமைச் செயலாளர் மனோ வெரபாத்ரன், மலேசிய தகவல் துறை தலைமை இயக்குநர் எர்வின் கைருல் அஹ்மத் மற்றும் HKHM 2026 அனுசரணைக் குழுத் தலைவரும் கட்டுப்பாடு மற்றும் இணக்கப் பிரிவு செயலாளருமான கமாருடின் அப்துல் ரானி உள்ளிட்டோர் கலந்து கொண்டனர்.
