மலேசியாவின் அடுத்த தலைமுறை டிஜிட்டல் திறமையாளர்களை உருவாக்கும் நோக்கில், CelcomDigi Berhad தனது முக்கிய திறன் மேம்பாட்டுத் திட்டமான CD:NXT-ன் அடுத்த கட்டத்தை அறிமுகப்படுத்தியுள்ளது.
கல்வித்துறைக்கும் தொழில்துறைக்கும் இடையிலான ஒத்துழைப்பை மேலும் வலுப்படுத்தும் வகையில் உருவாக்கப்பட்டுள்ள இந்த புதிய கட்டத்தில் campus@celcomdigi, Young Talent Programme (YTP) மற்றும் Certifications Programme என மூன்று முக்கியத் திட்டங்கள் இடம்பெறுகின்றன.
உயர்கல்வி அமைச்சின் தலைமை இயக்குநர் டத்தோ’ பேராசிரியர் டாக்டர் அஸ்லிண்டா அஸ்மான், உயர்கல்வி அமைச்சர் டத்தோ’ ஸ்ரீ டிராஜா டாக்டர் ஸம்ப்ரி அப்துல் காதிர் சார்பில் இத்திட்டத்தின் அடுத்த கட்டத்தை அதிகாரப்பூர்வமாகத் தொடங்கி வைத்தார்.
வகுப்பறையிலிருந்து நேரடி பணிச்சூழலுக்கு
மலேசியாவில் முதன்முறையாக அறிமுகப்படுத்தப்படும் வகையிலான campus@celcomdigi திட்டம், மாணவர்களின் வகுப்பறைக் கல்வியையும் தொழில்துறை அனுபவத்தையும் இணைக்கிறது.
இத்திட்டத்தின் கீழ், இரண்டாம் ஆண்டு மாணவர்கள் தங்களது பாடத்திட்டத்தின் ஒரு பகுதியாக உண்மையான வணிகச் சவால்களில் பணியாற்றுவார்கள். மேலும், படிப்புக் காலம் முழுவதும் தொழில்துறை நிபுணர்களிடமிருந்து வழிகாட்டுதலையும் பெறுவார்கள்.
தேர்ந்தெடுக்கப்படும் இறுதியாண்டு மாணவர்கள் CelcomDigi தலைமையகத்தில் அமைக்கப்பட்டுள்ள பிரத்யேக வளாகத்தில் தொழில்துறை பயிற்சியில் ஈடுபட்டு, அனுபவம் வாய்ந்த குழுக்களுடன் இணைந்து நேரடி திட்டங்களில் பணியாற்றும் வாய்ப்பைப் பெறுவார்கள்.
இந்தத் திட்டம் ஆரம்ப கட்டமாக Universiti Malaya (UM), Universiti Teknologi MARA (UiTM), Universiti Kuala Lumpur (UniKL) மற்றும் HELP University ஆகிய நான்கு பல்கலைக்கழகங்களுடன் இணைந்து செயல்படுத்தப்படவுள்ளது.
இறுதியாண்டு தொழில்துறை பயிற்சித் திட்டத்தின் மூலம் ஆண்டுதோறும் 300க்கும் மேற்பட்ட மாணவர்களை சென்றடைய CelcomDigi இலக்கு நிர்ணயித்துள்ளது. எதிர்காலத்தில் மேலும் பல பல்கலைக்கழகங்களை இத்திட்டத்தில் இணைக்கவும் திட்டமிடப்பட்டுள்ளது.
இளம் திறமையாளர்களை எதிர்காலத் தலைவர்களாக உருவாக்குதல்
CelcomDigi-யின் Young Talent Programme (YTP) கடந்த 2025ஆம் ஆண்டு அறிமுகப்படுத்தப்பட்டது. நவீன பணிச்சூழலில் சிறப்பாக செயல்படத் தேவையான திறன்கள், அறிவு மற்றும் சிந்தனை அணுகுமுறையை இளம் பட்டதாரிகளிடம் உருவாக்குவதே இதன் நோக்கமாகும்.
இரண்டு ஆண்டுகள் நடைபெறும் இந்தத் திட்டத்தில் பல்வேறு துறைகளில் பணிச்சுழற்சி, வழிகாட்டுதல் மற்றும் முக்கியமான வணிகத் திட்டங்களில் நேரடி பங்கேற்பு ஆகியவை இடம்பெறும்.
முதல் குழுவின் வெற்றியைத் தொடர்ந்து, YTP-யின் இரண்டாவது குழுவில் 20 திறமையான இளம் பட்டதாரிகள் இணைந்துள்ளனர். இவர்கள் Cloud Engineering, Cybersecurity, Data & Business Analytics, Digital Product Development மற்றும் AI & Automation உள்ளிட்ட துறைகளில் தங்களது தொழில் பயணத்தைத் தொடங்கவுள்ளனர்.
AI மற்றும் புதிய தொழில்நுட்பங்களில் திறன் மேம்பாடு
CD:NXT திட்டத்தின் மற்றொரு முக்கியப் பகுதியாக Certifications Programme அமைந்துள்ளது.
CelcomDigi Metaversity™ திட்டத்தின் அடித்தளத்தை மேலும் விரிவுபடுத்தும் இந்தத் திட்டம், செயற்கை நுண்ணறிவு (AI), Extended Reality (XR) உள்ளிட்ட வளர்ந்து வரும் தொழில்நுட்பங்களில் கற்றல் வாய்ப்புகளை வழங்குகிறது.
பள்ளி மற்றும் பல்கலைக்கழக மாணவர்கள் முதல் பணிபுரியும் தொழில்முறையாளர்கள் வரை பல்வேறு வயதினரும் இந்தக் கற்றல் வாய்ப்புகளின் மூலம் பயன்பெற முடியும்.
அங்கீகரிக்கப்பட்ட AI மற்றும் XR சான்றிதழ்கள் மூலம் மலேசியர்களின் டிஜிட்டல் திறன்களை மேம்படுத்தி, எதிர்கால வேலைவாய்ப்புகளுக்குத் தேவையான தொழில்துறைத் தகுதிகளை உருவாக்குவதே இதன் நோக்கமாகும்.
CelcomDigi-யின் தலைமை நிர்வாக அதிகாரி ஆல்பர்ன் முர்த்தி கூறுகையில், மலேசிய இளைஞர்களின் திறன்களை வளர்ப்பதில் தொழில்துறையும் அரசாங்கமும் இணைந்து செயல்பட வேண்டியதன் அவசியத்தை CD:NXT பிரதிபலிப்பதாகத் தெரிவித்தார்.
மலேசியாவின் டிஜிட்டல் பொருளாதார வளர்ச்சிக்கு தேவையான திறமைகளை உருவாக்குவதுடன், இளம் தலைமுறையினர் தங்கள் தொழில் வாழ்க்கையில் வளரவும், புதுமைகளை உருவாக்கவும், நாட்டின் எதிர்காலத்தை வடிவமைக்கவும் CD:NXT தொடர்ந்து முதலீடு செய்யும் என்றும் அவர் குறிப்பிட்டார்.
மலேசியாவின் நீண்டகால வளர்ச்சி இலக்குகளுக்கு ஏற்பவும், Rancangan Pendidikan Tinggi Malaysia (RPTM) 2026–2035 திட்டத்தின் நோக்கங்களுடன் இணைந்தும், டிஜிட்டல் பொருளாதாரத்தின் எதிர்காலத் தேவைகளைப் பூர்த்தி செய்யும் திறமைகளை உருவாக்குவதே CD:NXT-ன் முக்கிய நோக்கமாகும்.
