மலேசிய சுற்றுலா மற்றும் பயண முகவர்கள் சங்கம் (MATTA) ஏற்பாடு செய்துள்ள MATTA Connect 2026-இன் இரண்டாவது பதிப்பு, பேராக் மாநிலத்தின் ஈப்போ மாநாட்டு மையத்தில் (Ipoh Convention Centre – ICC)அதிகாரப்பூர்வமாகத் தொடங்கியது. இரண்டு நாட்கள் நடைபெறும் இந்த நிகழ்வு, மலேசியா மற்றும் உலகின் பல்வேறு நாடுகளிலிருந்து வந்துள்ள சுற்றுலா துறை பிரதிநிதிகளை ஒன்றிணைத்து, புதிய வணிக வாய்ப்புகள் மற்றும் கூட்டாண்மைகளை உருவாக்கும் முக்கிய தளமாக அமைந்துள்ளது.
தொடக்க விழாவில் பேராக் மாநில சுற்றுலா, தொழில், முதலீடு மற்றும் வழித்தட மேம்பாட்டு குழுத் தலைவர் லோ சி யீசிறப்பு விருந்தினராக கலந்து கொண்டார். Visit Malaysia 2026 இயக்கத்தை முன்னிட்டு, பேராக் மாநிலம் நாட்டின் முக்கிய சுற்றுலா மையமாக உருவெடுத்து வரும் நிலையில் இந்த நிகழ்வு நடைபெறுவது குறிப்பிடத்தக்கது.
2024ஆம் ஆண்டில் 1.02 கோடி இருந்த உள்நாட்டு சுற்றுலாப் பயணிகள் எண்ணிக்கை, 2025ஆம் ஆண்டில் 1.04 கோடியாக உயர்ந்துள்ளது. 2026ஆம் ஆண்டில் 12 இலட்சம் சர்வதேச சுற்றுலாப் பயணிகளையும், 1.05 கோடி உள்நாட்டு சுற்றுலாப் பயணிகளையும் வரவேற்க பேராக் மாநிலம் இலக்கு நிர்ணயித்துள்ளது.
பேராகில் நடைபெறும் MATTA Connect 2026, அதே நேரத்தில் நடைபெறும் MATTA Fair Perak உடன் இணைந்து, மாநிலத்தின் சுற்றுலா சிறப்புகளை உலக நாடுகளின் பயணத் துறை பிரதிநிதிகளிடம் அறிமுகப்படுத்தும் முக்கிய வாய்ப்பாக அமைகிறது.
MATTA தலைவர் நைஜல் வோங் கூறுகையில், “MATTA Connect என்பது சர்வதேச வாங்குபவர்களையும் மலேசிய சுற்றுலா நிறுவனங்களையும் இணைக்கும் முக்கிய தளமாகும். இது நீண்டகால வணிக கூட்டாண்மைகளை உருவாக்குவதோடு, புதிய சந்தைகளை அடையவும் உதவுகிறது. பேராக் மாநிலத்தின் பல்வேறு சுற்றுலா அனுபவங்களை உலகிற்கு அறிமுகப்படுத்துவதன் மூலம் Visit Malaysia 2026 இயக்கத்திற்கும் இது வலுசேர்க்கும்,” என்றார்.
ஜூலை 29 மற்றும் 30 ஆகிய இரு நாட்களில் நடைபெறும் இந்த நிகழ்வில், B2B வணிக சந்திப்புகள், சுற்றுலா இலக்கு விளக்கங்கள், தொழில்துறை வலையமைப்பு நிகழ்வுகள் மற்றும் Business Forum ஆகியவை இடம்பெறுகின்றன. இதில் சுற்றுலா துறையின் புதிய போக்குகள், டிஜிட்டல் மாற்றம், நிலையான சுற்றுலா வளர்ச்சி மற்றும் எதிர்கால வணிக வாய்ப்புகள் குறித்து நிபுணர்கள் கருத்துகளைப் பகிர்ந்து கொள்கின்றனர்.
இந்த வணிக மாநாட்டில் Tourism Malaysia, Tourism Perak, Macao Government Tourism Office (MGTO), Penang Global Tourism, Perak State Parks Corporation, Islamic Tourism Centre (ITC), RHB Bank, MyTravelKakiஉள்ளிட்ட பல்வேறு அமைப்புகள் தங்களது விளக்கங்களை வழங்குகின்றன.
நிகழ்வுக்கு முன்னதாக, தேர்ந்தெடுக்கப்பட்ட சர்வதேச வாங்குபவர்கள் ஜூலை 24 முதல் 28 வரை நடைபெற்ற ஐந்து நாள் சுற்றுலா அறிமுகப் பயணத்தில் கலந்து கொண்டு, ஈப்போ, குவாலா காங்சார், லெங்கோங் UNESCO உலக பாரம்பரியத் தளம் மற்றும் ராயல் பெலும் மழைக்காடு உள்ளிட்ட பேராகின் முக்கிய சுற்றுலா தலங்களை நேரில் பார்வையிட்டனர். இதன் மூலம் மலேசியாவின் சுற்றுலா சிறப்புகளை தங்கள் நாடுகளில் மேலும் சிறப்பாக விளம்பரப்படுத்தும் வாய்ப்பு அவர்களுக்கு கிடைத்துள்ளது.
MATTA Connect 2026-க்கு சுற்றுலா, கலை மற்றும் பண்பாட்டு அமைச்சு (MOTAC), Tourism Malaysia, Tourism Perak ஆகியவை ஆதரவு வழங்குகின்றன. அதிகாரப்பூர்வ வங்கி கூட்டாளராக RHB Bank Berhad செயல்படுவதுடன், Penang Global Tourism, MGTO, Meru Valley Resort Berhad மற்றும் Spritzer EcoPark Sdn. Bhd. ஆகியவை மூலோபாய கூட்டாளர்களாக இணைந்துள்ளன.
நிகழ்வின் முக்கிய ஆதரவாளர்களில் ஒன்றான Macao Government Tourism Office (MGTO), சர்வதேச வாங்குபவர்களுடன் நேரடி தொடர்பை ஏற்படுத்தும் வகையில் சிறப்பு Buyers’ Lounge ஒன்றையும் அமைத்துள்ளது.
MATTA Connect 2026 ஜூலை 30ஆம் தேதி நடைபெறும் நிறைவு விருந்துடன் நிறைவடைகிறது. இதில் மலேசிய சுற்றுலா, கலை மற்றும் பண்பாட்டு அமைச்சர் டத்தோ ஸ்ரீ தியோங் கிங் சிங் சிறப்பு விருந்தினராக கலந்து கொண்டு, அரசு மற்றும் தனியார் துறைகளின் ஒத்துழைப்பின் மூலம் மலேசிய சுற்றுலாத் துறையை மேலும் வலுப்படுத்த அரசின் உறுதிப்பாட்டை மீண்டும் வலியுறுத்த உள்ளார்.
